Art Central, Hong Kong
今年 Art Central 的白牆攤位入面，零零舍舍有個 tiffany blue 嘅空間，有砧板、電磁爐，仲有個雪櫃添。唔講唔知，以為係方太教你煮咩餸移師藝博會。掌廚的，唔係姓方，而係來自南韓的藝術家丘旼子（Minja GU）。
1977 年出生的丘旼子，喜歡透過創作思考日常消費主義與物件價值的關係。2014 年，她首次運用即食麵進行創作，並於印尼首次上演名為《The Authentic Quality》的藝術表演。生活在南韓的她每日接觸多種即食食品，吸引其注意力的不是方便快捷有飯開，而是圖片往往僅供參考，煮出嚟個樣總係同包裝說明嘅有（一大）段距離。因此，她嘗試模仿宣傳照，將即食食品重新炮製。製作過程一絲不苟，她甚至用尺度住每樣食材嘅大小，精心切割，耐心烹調。
就像今次來到香港，丘旼子選擇挑戰「合味道香辣海鮮杯麵」。她笑言，南韓料理俾人嘅印象都係紅色同辣口，但偏偏韓國當地係無「香辣海鮮」嘅口味，所以佢特別好奇香港有售嘅香辣口味到底係咩料子。Art Central 開幕當夜，她 5 點半準時開火，煮椰菜期間仲不時同圍觀嘅人傾偈，有講有笑，笑住話：「呢個杯麵我好可能煮足兩個鐘㗎！」
丘旼子首先將杯麵所有配料抽走，改用新鮮的辣椒、蔥、粟米、蛋、椰菜和八爪魚。配料的形狀並非隨意，而是經過藝術家連月來的研究。牆上貼著的繪圖都是她的「cup noodles study」結果，從杯麵的宣傳照中分析出每樣食材的數量和大小。佢認真到一個點，甚至將椰菜的形狀造成模具，跟住個模慢慢𠝹出嚟，咪話唔佩服！
佩服嘅，唔單只係佢呢份專業同專注，人來人往佢繼續細心地度尺切菜。你可能話，佢無唔無聊啲啊，一個杯麵煮兩個鐘，完全侮辱咗杯麵作為效率和進步嘅象徵。不過我又咁睇喎，正因為佢用慢抗衡咗快，將兩分鐘做完嘅嘢攤返開兩個鐘頭做，你先睇到機械幫忙縮減咗幾多時間，背後又有幾多人手工夫先成就到你兩分鐘開到飯嘅奇蹟。現代社會好多好方便嘅嘢都唔係必然，只係一切都太快，快到你根本睇唔到，或者唔會諗到。佢用超理性的方法，拆解重組唔起眼嘅杯麵，咩 size 都要度過算過，用人代入機械化生產，呈現工具理性荒謬的一面。
淥個杯麵都叫藝術？咁就要睇吓你個杯麵點整法喇！好似丘旼子咁分解再裝嵌，的確唔係「煮個麵你食咁簡單」。學著名 Lego 膠暨藝術家話齋，「on9的事認真做」，藝術可能就係咁簡單啊！
https://thestandnews.com/art/art-central-用藝術慢煮一個杯麵/?fbclid=IwAR3QDh9vqEjFPSrWfV22KN0eT86gXs8liHVYpjmWLXMaj8fegbOfl-7yzQo
No comments:
Post a Comment